- 408 -

1404. Sept. 11. o. O.

Handelsvertrag zwischen Schlesien, Böhmen und Preussen.

Im iare vnses hirrn tusund virhundert in dem virden iare am donrstage noch vnser frawen tage natiuitatis dese nochgeschreben hirren vnd sendeboten by namen hirre Franciscus probest czu Bolisslaw vnd des Romischen konigis obirster schriber, hirre Franciscus von Jebecz thumhirre czu Bresslaw, sendeboten uff dese czit des hirren Romischen konigis vnd der forsten von der Slezie Niclaus Bunczlaw vnd Lorenz Czirkewicz von Bresslaw, Heinrich von Moraw von wegin der stete Nicze vnd Brige von der eynen syten, hirre Johannes Ryman von des hirren homeisters wegin von Prewssen, hirre Gatke Rebber, Johan von der Mersse, Arnold vom Loe von Thorn, Arnolt Renber, Werner Wessel vom Elbinge, Johan Gatke vnd Hennyng Lankaw von Danczik von der andern syten habin dese nochgeschreben artikel vndirenandir von beider lande wegin obirczogin vnd voreynet czu halden in. sulcher wize, als hir noch stet geschreben. Czum ersten, was kowfmanschaft dy kowflute vs der cronen von Behemen vnd vs der Slezie her in dis land czn Prewssen willen brengen, domete se czihen dy alden strassen czu Thorn czu, vnd dy kaufmanschaft hir im lande vorkewffen adir czur sewart obir sehe schiffen ab vnd czu in welche lande se wellen sunder hinder vnd gever, als in das bequeme ist vnd als is von aldir gewonlich ist gewest, doch also, das keyner von den kowfluten obingeschrebin keiner ander lute gut, den das in dy vorgeschreben lande czu hus hort, vs andern landen her brenge noch czur sewart vnd her wedir vore.
Und weme man dos nicht irlosen wil, der sal sich des entsagen mit seyme eyde, wer abir bewizunge mit sich brenget adir by ymande her sendet, der endarff hir nicht sweren; der glich sollen dy kouflute vssem lande czu Prewssen in den vorgenanten landen auch tun, wil mans in nicht erlosen; auch sollen dy kouflute vs Prewssen mit yrer kowfmanschaft, welcherley dy ist, czihen dy alden gewonlichen strassen in dy crone czu Behemen vnd in dy Slezie dar in den landen vnd dorch dy lande, wo hen vnd in welche se begeren hen vnd weder sundir hinder vnd gever, als das auch von aldirs gewonlich ist gewest, ydoch das iczlich teil seine gewonliche czolle vnd vngelt sal gebin. Item welche kauflute komen vs Prewssen in dy crone czu Bemen vnd in dy Slezie, dy mogen do vff fryen iarmarkt vorkewffen by eynen ganczen laken, by halben laken, dy ir beide selbende habin, by eynen harras, eyn stucke kirsey, eyn stucke stokbreit vnd do bobin, sunder nicht mynner, der glich auch czu halden mit den moczen vnde ander allirley kowfmanschaft, vsgenomen hozen, dy man alleyne sal vorkewffen by dem tosin vnd nicht mynner.
Item mag eyn iczlicher kawfman vssem lande czu Prewssen sin gewant czu Bresslaw lossen legin, alz lange in gut dunket, vnschedelich des koniges camerczinse vnd welcher von den Prussen kouflute sin gewant dar abeladen wil, der sal das thun vnder dem kaufhuze.
Item mogen dy kouflute vs der kronen czu Behemen vnd vs der Slezie hir im lande czu Prewssen in allen steten vry allirley gewant vnd alle andir kowfmanschaft kewffen sundir alleyne wedir inwoner vnd burger dis landis vnd nicht wedir geste, auch alleine von irre wegin vnd nicht von andir lute wegin vs andern landen by vorlust desselbigen gutis, vsgenomen iarmarkte, in den vry sal sin gast mit gaste czukowfslagen, alz gewonlich ist. Item dese vorgeschreben artikel mitenander vnd iczlichs besundern in seiner voreynunge sal man iczunt anheben czuhalden czwischen hir vnd winachten nestcomende vnd binnen der czit sollen dy hirren sendeboten vs der cronen czu Behemen vnd vs der Slezie vorschriben stet den hirren von Thorn vorkundigen, ab se dese artikel vorbas aldus, als vorschreben stet, gehalden wellen habin vnd also vorsigeln wellen.
Liben hirren, obir alle vorgeschrebin stucke so wellen dy stete nicht gestaten, das gast mit gaste kawffen moge als weid, als das gancze land ist.
Item czu Thorn in der stat mag ein gast hering kewffen adir gewand adir was en lust wedir einen meteburger vil adir wenig nach seiner notdorft adir wedir einen, der nicht burger czu Thorn ist vnd sust im lande ist gesessen als czu Danczk, Elbinge, Konigsberg, Mergenborg etc. mag ein gast nicht kowffen czu Thornn in der stat vndir einer last hering, vndir czwelff laken, vndir vomsczik elen lymot, vndir vomsczik elen kyrsey, vndir vomsczik elen stocbreit, vndir eine thosen hozen vnd ander stucke, dy se czuwilkor halden, der wir eegintlich nicht gewissen mogen.
Item so mag doselbst zu Thornn kein gast des marktages vndir einem pfunde saffrans, ingeber, negelin, muscatblumen, muscaten vnd des glich, eime, der nicht burger ist doselbst vorkawffen, das vor frey gewest ist, vnd sust in der wochen, so mag kein gast vndir sechs phunden der vorgeschreben worcze vnd vndir eime steine pheffers vorkawffen.
Item was ein gast do kawffet, das mag er mit nichte do wedir vorkawffen, sunder er mus is weg furen vnd kompt gar ufte, wenn einer gekewffet vnd angeleget hat, das em andir ware zustozet, dy im getlicher were, vnd wol seinen fromen bas dar an gehaben muchte, mochte er denne dy erste vorkawffen, so kawfte er dy andir, dy em nuczer were, das er sust durch gebrechins willen des geldis nicht getun kan.
Item sulcher gesefcze adir gebot halden se gar vil in der stat, der wir nicht eigentlich gewissen konnen, dy nennen se der stat wilkore vnd wellen nicht, das maus gebot adir gesetcze heissen solle.
Item so tar kein vndirkawffer adir mekeler gast czu gaste brengen bey irem eyde vnd se halden alle dy vor geste, dy nicht burger zu Thornn syn.
Item so haben dy von Danczk sulcher wilkor auch gar vil. Rückaufschrift: Denn ersamen vnd wizen ratmannen zu Legnitz.

Abschrift der Lieg. Archiv-Acten No. 1.

Urkunden-Buch der Stadt Liegnitz und ihres Weichbildes bis zum Jahre 1455 - Herausgegeben dr Friedrich Wilhelm Schirrmacher - Liegnitz 1866